ودعتك الله

موضوع: ودعتك الله الإثنين نوفمبر 30, 2009 5:53 pm

السلام عليكم
جايب لكم اليوم قصيده انشالله ما تكون طويله
طبعا كالعاده
نزلت بدايتها فموضوع التحدي
لكن كانت مقربعه
فدخلتها الهاجس وسويت لها احلا صيانة
لإني بنزلها موضوع بس يا حسره ما ادري الصيانة تمام والا سيئه
وانا ما اقدر احكم
اكيد انتم راااح تحكمون
وهي كما تعلمون
مجاراة لقصيدة اخوي |عذب الاحساس|
القصيدة سماها :وفاة الشاعر عذب الاحساس
ومجارااتي
واحس انها طويله
لكن مسوي تخفيضاات <<هع
اقراء 11 بيت بعدين اذا جازت لك كمّل والا برااااحتك
هاااه الكلام للزوار
الحباايب لا.. كااامله والا ازعل
::::
النص
::
1ـ وجدي على برقـ/ن قشع ظلمة الكون
وجدي على ريح المطر والسحايب
2ـ وجدي على فجر/ن تغشّته المزون
بمر الولي..ساقت رياح الهبايب
3ـ والارض جدبا والمصلين يدعون
وهلت مطرها وحدّر الضلع سايب
4ـ وابتلت القُمرِي على عش مسكون
في قلب سدره والنحل فالوقايب
5ـ وهاج الربيعُ..والنغاري على غصون
تهزها النسمه معا كل صايب
6ـ لا يا وجودي عانّشامى يدقون
بن/ن هراري والسمر له شبايب
7ـ يمّت غدير/ن جاله الناس يسلون
والفطْر وآلم والعسل والرطايب
8ـ واعيني الي سدها باحه النون
وياروحي الي اتعبتها الثرايب
9ـ اواه يا قلي على الي يونون
ويلاه ياعيني على اهل المصايب
10ـ ما يرقدون الليل لصّبح يبكون
ودموعهم عجلا تسوق النحايب
11ـ يا مرحبا يا |عذب| في قافك النون
فجعت قلبي بالخبر والحبايب
12ـ قريت انا بدعك وهزيت مكنون
فجّر سكونه ..القبر والنصايب
13ـ برد لك بالقاف والكل يقرون
آخر قصيده تنكتب لي لهايب
14ـ آخر قصيده هلها صدر محزون
نقشتها في جذع دنيا الغرايب
15ـ كتبتها والدمع للشوق مرهون
كتبتها ياخوك والوعي غايب
16ـ الامر لله انتهى الصبر والعون
معاد بي حيله ولا به حسايب
17ـ بوادع الاحباب من قبل يقفون
واوادع الاخوان وكل الصحايب
18ـ الشاهد الله خالق الارض والكون
لكم معزه لكن القلب طايب
19ـ معاد يبغى يكسب اذنوب وظنون
تدمِي قلوب اهل الوفاء والقرايب
20ـ ودعتك الله بترك الشوق مسجون
في وصط صدري ما يعرف السبايب
21ـ ينشد عيوني وتذرف الدمع مغبون
اتقول ذاهب مير ما اظن آيب
22ـ يا|عذْب| اقراء ماكتبته على هون
ركز وتلقى لي عذر فانوايب
23ـ وعدت انا بعض العرب عهد مضمون
اني ما اروح واترك الظن خايب
24ـ اثنى عزومي وأنتشاني من الدون
من زود طيبه قلت مانيب غايب
25ـ لكن قريت ان النبي عاد! ..وشلون
تبغى محبه ما يشد الركايب؟
26ـ اذا رئى امر/ن حلف فيه ويكون
مُخالفته اصوب ولا فيه عايب
27ـ كفّر يمينه ثم رجع للأصل دون
أيّة حرج لنّه يرسّخ نصايب
28ـ ما تقراء القرآن من |قاف| لا|نون|
في سورة التحريم شوف العتايب
29ـ رجع وكفّر والصحابه يشوفون
رجع وصدره زاكيـ/ن بالرحايب
30ـ ياخوك انا في خاطري سر مكنون
اخاف ابوحه وابتلش بالعطايب
31ـ واخاف انا من ناقل الهرج يدرون
ويضيع سري بين زور وكذايب
32ـ مشيت انا في ديرة الحب بعيون
حذرى تخاف الغش واهل النهايب
33ـ متوقّده تحسب على الي يبيعون
فيها نشاط الطفل مع حرص شايب
34ـ لكن وقعت وطحت في بير مدفون
به نبعت/ن تسلب قروم/ن لبايب
35ـ يجيلها اهل الوفا دوم يسقون
ما ياوردونه لكن الزين جايب
36ـ ما يورده غير المساكين وضعون
وعن خيرها حدث عيون/ن عذايب
37ـ ماها قراح/ن اشغلت قلب مفتون
والعالم الله اصبح القلب ذايب
38ـ لو اتمنّي ينفع الرجل بلعون
يمدى زوجي جاهز/ن بالزهايب
39ـ لكن لك الله بُعدها صار مضمون
وحالت بنا القدار مع كل نايب
40ـ سجيت في همي عسى الخلق يوفون
ولو ما وفيت فظن بعض الحبايب
41ـ اعزهم ياليت لو بس يرضون
واردّ عنهم كل ظلم وشوايب
42ـ درب الردى ما اجيه لو كان يمشون
كل البريه فيه ويا القرايب
43ـ ياخوك انابعطيك نصحي وانا امون
ماني كبير/ن لكن العقل رايب
44ـ لله سُنة سابغه وسط قانون
في دنيته لهل القلوب الرغايب
45ـ من دس سر/ن في ضميره عن الكون
يكشفه ربي فالسنين العجايب
46ـ إن كان خير/ن يبشر بخير ومنون
ون كان شر/ن رااح مال الذهايب
47ـ ياخوك إذا ما مت والناس يبكون
وبكت عليك الوالده والحبايب
48ـ ودعى لك الشايب وفي قلبه طعون
وأجهش عليك ابدمعتة فالنصايب
49ـ ورفع يدينه للولي وانت مركون
لآخر وداعه..للأهل والقرايب
50ـ لا والذي نفسي بيدّه مع الكون
ما تنفعك دعوة إذا كنت خايب
51ـ افضيت إلى ربك بالعمال مرهون
وكل فعل/ن ثابت/ن فالرقايب
52ـ لا ما اتئلاء لكن الدين موزون
ونصّ ابكلامي واسئل اهل النجايب
53ـ يخوك لا تمشي مع الي يسجون
وابكي على ذنبك ولو كنت صايب
54ـ لاتحسبني يوم اناديك مصيون
ولا أجي الزلات مع كل خايب
55ـ من ينصحك غرقان بالذنب مشحون
وكل البريه عندها به طلايب
56ـ يارب في عينك عسى يوم ما اهون
يدعيك عبد/ن راجيـ/ن بك|وهايب
57ـ يارب جيتك تايب وخايف اكون
في نارك الكبرى وقود وحطايب
58ـ والاّ انحشر يارب مع قوم فرعون
والاّ اجي بذنوب مثل الربايب
59ـ يامن إذا ما رآد الكاف والنون
يقولها وتكون فعله عجايب
60ـ يالله عفوك قلتها ابدمع وشجون
جيتك ندم ابكي من الذنب تايب

[ندعوك للتسجيل في المنتدى أو التعريف بنفسك لمعاينة هذه الصورة]

» تحميل كليب محمد منير - بسم الله الله اكبر بسم الله
» تحميل اسطوانة تعلم مع متقن لصفوف الاولي من التعليم
» حليمة السعديه ام رسول الله صلى الله عليه وسلم من الرضاع